ഇന്ന് രാവിലെ പൊലീസ് കേസെടുത്ത വിവരമറിഞ്ഞ് മറുനാടന്‍ സിപ്സിയെ ഫോണില്‍ ബന്ധപ്പെട്ടപ്പോഴാണ് സിപ്സി ഇക്കാര്യങ്ങള്‍ വിശദീകരിച്ചത്. ഇവരെ നേരില്‍ കാണാന്‍ കഴിയുമോ എന്ന് ചോദിച്ചപ്പോള്‍ ആശുപത്രിയിലാണെന്ന് മറുപടി പറഞ്ഞു. ഏത് ആശുപത്രിയാണ് എന്ന് ചോദിച്ചപ്പോള്‍ സെന്റെ ജോണ്‍സ് എന്ന് പറഞ്ഞു. സ്ഥലം എവിടെ എന്ന് ചോദിച്ചപ്പോള്‍ ആദ്യം തിരുവനന്തപുരമെന്നും പിന്നീട്
കോട്ടയമെന്നും പറഞ്ഞു. ഇതിനിടയില്‍ പൊലീസ് ഇവരെ വളയുകയും കസ്റ്റഡിയിലെടുക്കുകയുമായിരുന്നു.
മറുനാടനോട് സംസാരിക്കുമ്ബോള്‍ സിപ്സി പൂന്തുറ പൊലീസ് സ്റ്റേഷന്‍ പരിധിയിലായിരുന്നു. പൊലീസ് അറസ്റ്റ് ചെയ്യുമെന്ന് മനസ്സിലാക്കി ഒളിവില്‍ പോകാന്‍ ശ്രമിക്കുമ്ബോഴാണ് പൊലീസ് പിടികൂടുന്നത്. ഫോണ്‍കോളുകള്‍ കേന്ദ്രീകരിച്ച്‌ പൊലീസ് ഇവരുടെ പിന്നാലെ തന്നെയുണ്ടായിരുന്നു. അവസാന ഫോണ്‍കോള്‍ അവസാനിക്കും മുന്‍പ് തന്നെ പൊലീസ് ഇവരെ പിടികൂടുകയായിരുന്നു.
അങ്കമാലി സ്വദേശിനിയായ സിപ്സിയെ തിരുവനന്തപുരം പൂന്തുറ പൊലീസാണ് അറസ്റ്റ് ചെയ്തത്. വെള്ളിയാഴ്ച വൈകിട്ട് തിരുവനന്തപുരത്ത് എത്തിയ സിപ്സി, തമ്ബാനൂരിലെ ഒരു ലോഡ്ജില്‍ താമസിച്ച ശേഷം ശനിയാഴ്ച രാവിലെ ബീമാപള്ളിയിലേക്ക് പോയി. ഇവര്‍ വേഷംമാറി ഇവിടെ എത്തിയ വിവരം അറിഞ്ഞ പൂന്തുറ പൊലീസ് എത്തി പിടികൂടുകയായിരുന്നു. പൂന്തുറയില്‍ സിപ്സിയുടെ ഒരു സുഹൃത്തുണ്ട്. ഈ സുഹൃത്തുവഴിയാണ് ഇവര്‍ പൂന്തുറയിലെത്തിയതെന്നാണ് വിവരം. ബാലനീതി നിയമപ്രകാരം ജാമ്യമില്ലാ വകുപ്പുകള്‍ ചുമത്തിയാണ് സിപ്സിയെ അറസ്റ്റ് ചെയ്തിരിക്കുന്നത്. കുഞ്ഞിന്റെ അച്ഛനായ സജീവിനെതിരേയും പൊലീസ് കേസെടുത്തിട്ടുണ്ട്.
കുഞ്ഞിന്റെ അച്ഛന്‍ സജീവ്, മുത്തശ്ശി സിപ്സി എന്നിവര്‍ക്കെതിരേ ബാലനീതി വകുപ്പ് പ്രകാരമാണ് കേസെടുത്തിരിക്കുന്നത്. തിങ്കളാഴ്ച രാത്രിയാണ് കൊച്ചിയിലെ ഹോട്ടലില്‍വെച്ച്‌ ഒന്നരവയസ്സുകാരി നോറ മരിയയെ വെള്ളത്തില്‍ മുക്കിക്കൊന്നത്. സംഭവത്തില്‍ കുഞ്ഞിന്റെ മുത്തശ്ശിയുടെ കാമുകന്‍ ജോണ്‍ ബിനോയി ഡിക്രൂസിനെ പൊലീസ് നേരത്തെ അറസ്റ്റ് ചെയ്തിരുന്നു. സിപ്‌സിയോടുള്ള വൈരാഗ്യത്തിന്റെ പേരിലാണ് കുഞ്ഞിനെ കൊലപ്പെടുത്തിയതെന്നാണ് ബിനോയിയുടെ മൊഴി.
സിപ്‌സിയും ബിനോയിയും ഏറെനാളായി ഒരുമിച്ചായിരുന്നു താമസം. നേരത്തെ മോഷണം, ലഹരിക്കേസുകള്‍ അടക്കം പല കേസുകളിലും പ്രതിയാണ് സിപ്സി. അടുപ്പത്തിലായിരുന്ന ബിനോയിയും സിപ്‌സിയും പലതവണ വഴക്കിട്ടിരുന്നു. തന്നെക്കാള്‍ പ്രായക്കൂടുതലുള്ള സിപ്സിയെ ഒഴിവാക്കാന്‍ ബിനോയി ശ്രമിച്ചെങ്കിലും നടന്നില്ല. ഒഴിവാക്കാന്‍ ശ്രമിച്ചതോടെ ബിനോയിക്കെതിരേ സിപ്സി പരാതിയും നല്‍കി. മാത്രമല്ല, കൊല്ലപ്പെട്ട ഒന്നരവയസ്സുകാരി ബിനോയിയുടെ കുഞ്ഞാണെന്നും സിപ്സി പലരോടും പറഞ്ഞിരുന്നു. ഈ പ്രശ്‌നങ്ങളെല്ലാമാണ് കുഞ്ഞിന്റെ കൊലപാതകത്തില്‍ കലാശിച്ചതെന്നാണ് ബിനോയി പൊലീസിനോട് പറഞ്ഞിട്ടുള്ളത്.
കലൂരിലെ ഹോട്ടല്‍ മുറിയില്‍ ഒന്നര വയസ്സുകാരിയെ ബക്കറ്റില്‍ മുക്കിക്കൊന്ന കേസില്‍ അമ്മൂമ്മ സിപ്സിക്കെതിരേ ജുവനൈല്‍ ജസ്റ്റിസ് ആക്‌ട് പ്രകാരം കേസെടുത്തത് കഴിഞ്ഞ ദിവസമായിരുന്നു. കൊലപാതകത്തില്‍ സിപ്സിക്ക് പങ്കില്ലെന്നാണ് പൊലീസിന്റെ നിഗമനം. എന്നാല്‍, ഇവരുടെ പേരില്‍ വിവിധ ജില്ലകളില്‍ മോഷണം മുതല്‍ കഞ്ചാവ് കേസുകള്‍ വരെയുണ്ടെന്ന് പൊലീസ് കണ്ടെത്തിയിട്ടുണ്ട്. അതേസമയം ഒന്നരവയസ്സുകാരിയെ ബക്കറ്റില്‍ മുക്കി കൊലപ്പെടുത്തിയ സംഭവത്തില്‍ വിശദ അന്വേഷണത്തിന് പൊലീസ്. കുട്ടികള്‍ക്ക് മാതാപിതാക്കളുള്ളപ്പോള്‍ ഇവരുടെ സംരക്ഷണം മുത്തശ്ശിയുടെ കൈകളില്‍ എങ്ങനെ എത്തിയെന്നതാണ് പ്രധാനമായും നോക്കുന്നതെന്ന് സിറ്റി പൊലീസ് കമ്മിഷണര്‍ സി.എച്ച്‌. നാഗരാജു വ്യക്തമാക്കിയിരുന്നു.
സിപ്സി, തന്നെ ഭീഷണിപ്പെടുത്തിയാണ് കുട്ടികളെ ഒപ്പം കൊണ്ടുപോയതെന്നാണ് അമ്മ ഡിക്‌സിയുടെ ആരോപണം. കുഞ്ഞിന്റെ പിതാവും സിപ്സിയുടെ മകനുമായ പാറക്കടവ് കൊടുശ്ശേരി സ്വദേശി സജീവന്റെ പശ്ചാത്തലവും പൊലീസ് അന്വേഷിക്കുന്നുണ്ട്. താന്‍ ദുബായില്‍നിന്ന് നാട്ടിലേക്ക് വരുമെന്നറിഞ്ഞ് ഭര്‍ത്താവ് ഭീഷണിസന്ദേശം അയച്ചിരുന്നെന്ന് കുഞ്ഞിന്റെ അമ്മ ഡിക്സി പറയുന്നുണ്ട്. ഡിക്സി വിദേശത്തായിരുന്നപ്പോള്‍ അവരുടെ അമ്മ മേഴ്സി ശ്രമിച്ചെങ്കിലും കുട്ടികളെ വിട്ടുകൊടുത്തില്ലെന്നാണ് അറിയുന്നത്. കേസില്‍ പ്രതിയായ ബിനോയിക്കെതിരേ ഇതുവരേ പൊലീസ് സ്റ്റേഷനുകളില്‍ കേസുകളൊന്നുമില്ല. സിപ്സി മക്കളെ നിയമവിരുദ്ധ പ്രവര്‍ത്തനങ്ങള്‍ക്ക് മറയാക്കിയിരുന്നതായി കൊല്ലപ്പെട്ട നോറ മരിയയുടെ അമ്മ ഡിക്സി ആരോപിച്ചതും പൊലീസ് ഗൗരവത്തിലെടുത്തിട്ടുണ്ട്.
സിപ്സിയുടെ കാമുകനായ ജോണ്‍ ബിനോയ് ഡിക്രൂസ് റിമാന്‍ഡിലാണ്. അങ്കമാലി പാറക്കടവ് കോടുശേരി മനന്താനത്തുവീട്ടില്‍ സജീവിന്റെയും ഡിക്സിയുടെയും ഇളയ മകള്‍ ഒരു വയസ്സും എട്ടുമാസവും പ്രായമുള്ള നോറ മരിയയെ തിങ്കളാഴ്ച അര്‍ധരാത്രിയോടെയാണ് ജോണ്‍ ബിനോയ് ഡിക്രൂസ് വെള്ളത്തില്‍ മുക്കിക്കൊന്നത്. കുഞ്ഞിന്റെ മുത്തശ്ശിയും തന്റെ കാമുകിയുമായ സിപ്‌സിയോടുള്ള പക തീര്‍ക്കാനാണ് ഒന്നര വയസ്സുകാരി നോറയെ കൊലപ്പെടുത്തിയതെന്ന് പ്രതി ജോണ്‍ ബിനോയ് ഡിക്രൂസ് പറഞ്ഞിട്ടുണ്ട്.
Stories you may Like
Post a Comment